དབུས་བོད་མིའི་སྒྲིག་འཛུགས་ནང་སྲིད་བཀའ་བློན་གྱི་གསུང་འཕྲིན།
༄༅།། ལྷ་སྤྱི་ཚོགས་ཞབས་ཞུ་དང་ཤེས་ཡོན་ལྟེ་གནས་ཁང་དབུ་བརྙེས་ནས་ལོ་ངོ་ཧྲིལ་པོ་ཉི་ཤུ་འཁོར་བའི་དུས་དྲན་སྲུང་རྩི་གནང་འཆར་ཡོད་པར་ཤེས་རྟོགས་བྱུང་བར་སྤྲོ་བ་ཆེ། དེ་རིང་གི་གོ་སྐབས་བཟང་པོ་འདི་བརྒྱུད་ཚོགས་པ་འདི་གསར་འཛུགས་གནང་མཁན་དང་། ཚོགས་མི། རྒྱབ་སྐྱོར་བ་སོགས་ཚང་མ་ལ་བཀྲ་ཤིས་བདེ་ལེགས་ཞུ་རྒྱུ་ཡིན།
འདས་པའི་ལོ་ཉི་ཤུའི་ནང་། ལྷ་ཚོགས་པས་བོད་པའི་སྤྱི་ཚོགས་དང་། ས་གནས་རྒྱ་གར་མི་མང་། ཉེ་འཁོར་གྱི་ཧི་མ་ལ་ཡའི་རི་རྒྱུད་སོགས་ཀྱི་མི་མང་ལ། བོད་ཀྱི་རིག་གཞུང་དང་སྐད་ཡིག་སྲུང་སྐྱོབ། རིགས་གཞུང་བརྗེ་རེས། རྒྱལ་སྤྱིའི་སྐད་ཡིག་འཛིན་གྲྭ། འཕྲོད་བསྟེན་དང་ཁོར་ཡུག་སྐོར་གྱི་སློབ་གསོ། འཐུང་ཆུ་གཙང་མ་མཁོ་འདོན། རིན་མེད་སྨན་བཅོས། སོ་དང་མིག་ལ་བརྟག་དཔྱད་དང་སྨན་བཅོས་སོགས་ཀྱི་ལས་གཞིའི་འོག་ཞབས་ཞུ་བླ་མེད་བསྒྲུབས་འདུག་ཅིང་། དྷ་སའི་བྱམས་པ་གླིང་རྒན་གསོ་ཁང་དང་། བོད་ཀྱི་གཞིས་ཆགས་ཁ་ཤས་ལ་ཐབས་སྣ་ཚོགས་ཀྱིས་རོགས་སྐྱོར་གང་ལེགས་གནང་ཡོད་པ་བཅས་ལ་བསྔགས་བརྗོད་ཞུ་རྒྱུ་དང་སྦྲགས།
ལྷའི་ལས་བྱེད་རྣམས་ལ་རླབས་ཆེ་བའི་ལས་དོན་འདི་དག་མུ་མཐུད་ནས་བསྒྲུབ་རྒྱུར་བསྐུལ་མ་ཞུ་རྒྱུ་ཡིན།
མཇུག་ཏུ་ལྷ་ཚོགས་པའི་སྦྱིན་བདག་དང་། ལས་བྱེད་ཚང་མར་བཀྲ་ཤིས་བདེ་ལེགས་ཞུ་བ་དང་། ཁྱེད་རྣམས་ཀྱི་བྱ་གཞག་མཐའ་དག་ལེགས་གྲུབ་ཡོང་བའི་སྨོན་འདུན་དང་བཅས་དབུས་བོད་མིའི་སྒྲིག་འཛུགས་ཀྱི་ནང་སྲིད་བཀའ་བློན་འཁོར་ལྷ་ཚང་བསོད་ནམས་སྟོབས་རྒྱལ་གྱིས་ཕྱི་ལོ་ ༢༠༡༧ ཟླ་ ༡༠ ཚེས་ ༢༥ དགེ་བར།