ཕྱི་ལོ་ ༡༩༩༨ ལོར་རྒྱ་གར་ནང་ཐོག་མར་བྱམས་པ་ཚེ་རིང་དང་ཨ་རི་བ་ནེལ་གྷུ་ཌུ་རེ་གཉིས་ཀྱིས་གཙོ་བྱས་ཏེ་བོད་ནས་གསར་དུ་ཕེབས་མཁན་གཞོན་སྐྱེས་འགའ་མཉམ་འབྲེལ་གྱིས་གསར་འཛུགས་བྱས་ཤིང་། སྐབས་དེར་བྷག་སུ་ལམ་ཟུར་དུ་ཡོད་པའི་ལྕགས་ཤོག་ཁང་པ་ཆུང་ཆུང་ཞིག་ནང་ཚོགས་པའི་ལས་ཁུངས་དང་འཛིན་ཁང་སོགས་མཉམ་དུ་བེད་སྤྱོད་དང་འབྲེལ། ལས་གཞིའི་ཐོག་མ་ནི་ཨིན་ཇིའི་སྐད་ཡིག་དང་ཀམ་པུ་ཊར་འཛིན་གྲྭ་ཚོགས་ཤིང་། དེ་དང་མཉམ་དུ་གྱོན་གོས་དང་སྨན་སོགས་ཀྱི་ཞལ་འདེབས་བསྡུ་རུབ་དང་། རིན་མེད་བགོ་འགྲེམ། ཞོར་དུ་དྷ་སའི་ལམ་ཟུར་དུ་ཡོད་པའི་མཛེ་ནད་ཡོད་མཁན་རིགས་ལ་སྨན་བཅོས་ཡང་བྱེད་ཀྱི་ཡོད་པ་རེད།

ཕྱི་ལོ་ ༢༠༠༣ བར་ཚོགས་པའི་ལས་ཁུངས་དང་འཛིན་ཁང་སོགས་ས་གནས་དེ་རང་ལ་རྟེན་གཞི་བྱས་ཤིང་། རྗེས་སུ་སྤྱི་ཚོགས་ནང་ཞབས་ཞུའི་ལས་རིགས་དགོས་མཁོ་ཆེ་རུ་དང་འཛིན་གྲྭར་ཡོང་མཁན་སོགས་མང་དུ་ཕྱིན་པར་བརྟེན། ཕྱི་ལོ་ ༢༠༠༤ ལོར་ཚོགས་པའི་ལས་ཁུངས་དང་འཛིན་ཁང་སོགས་ད་ལྟའི་གནས་ཡུལ་དྷ་སའི་མཉམ་ལས་ཀྱི་གནམ་མཚོ་མགྲོན་ཁང་གི་ཁང་མིག་བདུན་ཙམ་གཡར་ཏེ་སྤྱི་ཚོགས་ཞབས་ཞུའི་ལས་དོན་རྒྱ་ཆེ་ཙམ་བྱེད་འགོ་བཙུགས། སྐབས་དེར་སྐད་ཡིག་འཛིན་ཁང་གཅིག་དང་ཀམ་པུ་ཊར་འཛིན་ཁང་གཅིག ཐབ་ཚང་གཅིག དཔེ་མཛོད་ཁང་གཅིག ལས་ཁུངས་གཅིག་བཅས་ཡོད།

ཕྱི་ལོ་ ༢༠༠༦ ལོར་ཚོགས་པའི་གནམ་མཚོ་མགྲོན་ཁང་གི་ཁང་མིག་ཆ་ཚང་གཡར་ཏེ་འཛིན་གྲྭ་འཚོགས་ས་དང་། ལས་ཁུངས། ལས་ཤག བསྐུ་མཉེ་གཏོང་ས། ཕྱི་རྒྱལ་ཚོར་བོད་ཡིག་སློབ་སའི་འཛིན་ཁང་། ཅ་དངོས་ཉར་ས་སོགས་ལ་བེད་སྤྱོད་བྱས་ཡོད། ཕྱི་ལོ་ ༢༠༠༥ ལོར་ཚོགས་པའི་འགན་འཛིན་ཟུར་པ་བཀྲ་ཤིས་རྡོ་རྗེའི་འགན་ཁུར་འོག་རྒྱ་གར་གཞུང་ལ་ཡིད་ཆེས་དགེ་རྩའི་མིང་ཐོག་ནས་ཁྲིམས་མཐུན་དེབ་སྐྱེལ་བྱས་རྗེས། ཚོགས་པའི་དངུལ་རྩིས་ཀྱང་གནས་ཡུལ་རྒྱ་གར་གཞུང་གིས་ངོས་ལེན་ཡོད་པའི་ཁྱད་ལས་རྩིས་པས་རྩིས་ཞིབ་དང་འབྲེལ། སྙན་ཐོ་འདོན་གྱི་ཡོད་པ་དང་། རྒྱ་གར་དབུས་གཞུང་དཔྱ་ཁྲལ་ལས་ཁུངས་ཀྱིས་ཚོགས་པའི་དངུལ་རྩིས་ལ་ཞིབ་བཤེར་གྱིས་དག་མཆན་གནང་བཞིན་པར་བརྟེན།