བཞུགས་སྒར་དྷ་རམ་ས་ལ་རྟེན་གཞི་བྱས་པའི་ལྷ་སྤྱི་ཚོགས་ཞབས་ཞུ་དང་ཤེས་ཡོན་ལྟེ་གནས་ཁང་གི་འགན་འཛིན་ངག་དབང་རབ་རྒྱས་ལགས་ཕྱི་ལོ་ ༢༠༡༨ ཟླ་ ༥ ཚེས་ ༣༡ ཉིན་འགན་འཛིན་གྱི་ལས་གནས་ནས་རྩ་དགོངས་ཞུ་གནང་རྗེས། ལྷའི་དྲུང་ཆེ་རྡོ་རྗེ་སྐྱིད་ལགས་ལྷ་སྤྱི་ཚོགས་ཞབས་ཞུ་དང་ཤེས་ཡོན་ལྟེ་གནས་ཁང་གི་འགན་འཛིན་གསར་པར་བསྐོ་བཞག་བྱས་ཡོད་པ་རེད།
ངག་དབང་རབ་རྒྱས་ལགས་ཀྱིས་ཕྱི་ལོ་ ༢༠༠༧ ནས་ ༢༠༡༨ བར་དུས་ཡུན་ལོ་ ༡༡ ཙམ་རིང་ལྷའི་འགན་འཛིན་གྱི་ཕྱག་ལས་གནང་བའི་རིང་ཚོགས་པའི་ལས་དོན་ཁག་གྲུབ་འབྲས་གཟེངས་སུ་ཐོན་པ་བྱུང་ཡོད། བཙན་བྱོལ་བོད་པའི་སྤྱི་ཚོགས་ནང་ཁེ་མེད་སྤྱི་ཚོགས་ཞབས་ཞུའི་ཚོགས་པ་ཆེ་ཤོས་ཆགས་ཡོད་པ་དང་། ཚོགས་པ་འདི་ཉིད་ས་གནས་བོད་མི་དང་རྒྱ་གར་བ་ཙམ་མ་ཟད། རྒྱལ་སྤྱི་ཐོག་ནས་ཀྱང་བྱ་དགའ་རིམ་པ་འགའ་ཤས་ཐོབ་པའི་ངོས་འཛིན་དང་གདེང་འཇོག་ཆེན་པོ་ཡོད་པའི་ཚོགས་པ་ཞིག་ཆགས་ཐུབ་པ་བྱུང་ཡོད།
ང་ཚོས་ལྷའི་འབྲེལ་ཡོད་ལས་བྱེད་ཡོངས་དང་ཁེ་ཕན་ཐོབ་མཁན་ཚང་མའི་ཚབ་ཞུས་ནས་ལོ་མང་རིང་ཁོང་གི་དཀའ་ངལ་ཁྱད་བསད་ཀྱིས་ཕྱག་ལས་དང་བློས་གཏོང་ལ་ཐུགས་རྗེ་ཆེ་ཞུ་རྒྱུ་དང་། ང་ཚོས་ངག་དབང་ལགས་ཀྱི་མ་འོངས་པའི་ལས་དོན་ཚང་མ་ལམ་ལྷོང་ཡོང་བའི་སྨོན་འདུན་དང་མ་འོངས་པར་ཁོང་གི་མུ་མཐུད་ནས་ང་ཚོ་ལ་རྒྱབ་སྐྱོར་དང་ལམ་སྟོན་གནང་རྒྱུའི་རེ་སྐུལ་ཞུ་བཞིན་ཡོད།
རྡོ་རྗེ་སྐྱིད་ལགས་ཀྱིས་ཕྱི་ལོ་ ༢༠༡༨ ཟླ་ ༦ ཚེས་ ༡ ཉིན་ལྷ་སྤྱི་ཚོགས་ཞབས་ཞུ་དང་ཤེས་ཡོན་ལྟེ་གནས་ཁང་གི་འགན་འཛིན་གྱི་ཕྱག་ལས་དངོས་སུ་འགོ་འཛུགས་གནང་བ་དང་། སྐབས་དེར་ལྷའི་ལས་ཁུངས་ནང་སྲོལ་རྒྱུན་གྱི་མཛད་སྒོ་སྟབས་བདེ་ཞིག་བྱས་རྗེས་འགན་འཛིན་གསར་རྙིང་བར་རྩིས་སྤྲོད་རྩིས་ལེན་སོགས་ཀྱི་བྱེད་སྒོ་ཁག་ལེགས་གྲུབ་བྱུང་ཡོད།
རྡོ་རྗེ་སྐྱིད་ལགས་ཕྱི་ལོ་ ༢༠༡༥ ལོར་ཚོགས་པ་འདིའི་ནང་འཛུལ་ཞུགས་བྱས་ནས་ཐོག་མར་ལས་འཆར་འགན་འཛིན་དང་། དེ་རྗེས་ཕྱི་ལོ་ ༢༠༡༦ ལོར་སྤྱི་ཁྱབ་དྲུང་ཆེར་བསྐོ་བཞག་བྱས། ལྷའི་ནང་འཛུལ་ཞུགས་མ་བྱས་སྔོན་དབུས་བོད་ཀྱི་བུད་མེད་ལྷན་ཚོགས་ཀྱི་ཁོར་ཡུག་ཚན་པའི་འགན་འཁུར་ཕྱག་ལས་གནང་།
དེའི་སྐབས་སུ་ཁོ་མོ་ཕྱི་ལོ་ ༢༠༡༤ ལོར་ལྷོ་ཨ་ཧྥི་རི་ཁའི་རྒྱལ་ཁབ་ཕེ་རུའི་རྒྱལ་ས་ལེ་མཱ་ནང་ཚོགས་པའི་མཉམ་འབྲེལ་རྒྱལ་ཚོགས་ཀྱི་གནམ་གཤིས་འགྱུར་ལྡོག་སྐོར་གྱི་ཚོགས་འདུ་ཐེངས་ ༢༠ པར་མཉམ་ཞུགས་གནང་ཡོད་པ་རེད།
མ་ཚད་ཁོ་མོ་བོད་ཀྱི་བུད་མེད་ལྷན་ཚོགས་ཀྱི་བུད་མེད་ཀྱི་ཁྲིམས་མཐུན་དང་ནུས་སྟོབས་གོང་སྤེལ་གྱི་ལས་གཞིའི་ཆ་ཤས་སུ། རྒྱ་གར་བྱང་ཕྱོགས་ཁུལ་གྱི་བཙན་བྱོལ་བོད་མིའི་གཞིས་ཆགས་ཁག་ ༡༥ དང་སློབ་གྲྭ་ཁག་ ༡༣ ཙམ་གྱི་ནང་སྐོར་སྐྱོད་ཀྱིས་རྒྱ་གར་གྱི་རྩ་ཁྲིམས་འོག་བྱིས་པ་དང་བུད་མེད་ཁྲིམས་མཐུན་གྱི་སྲུང་སྐྱོབ་བྱེད་ཐབས་སྐོར་གོ་རྟོགས་སྤེལ་ཡོད།
རྡོ་རྗེས་སྐྱིད་ལགས་ཕྱི་ལོ་ ༡༩༩༣ ལོར་བོད་ནས་རྒྱ་གར་དུ་འབྱོར་རྗེས་ཐོག་མར་གྷོ་པལ་ཕུར་བོད་ཁྱིམ་དང་སུ་ཇཱ་བོད་ཁྱིམ་སློབ་གྲྭ་བཅས་ལ་སློབ་གཉེར་གནང་བ་དང་། དེ་རྗེས་རྒྱ་གར་ལྷོ་ཕྱོགས་མཱ་རྡ་རཱ་སི་གཙུག་ལག་སློབ་གཉེར་ཁང་ནས་གསར་འགོད་རིག་པའི་ཐོག་ཉེ་བའི་གཙུག་ལག་རམ་འབྱམས་པ་དང་སློབ་གླིང་དེ་ག་ནས་སྤྱི་ཚོགས་འབྲེལ་ལམ་ཐོག་གཙུག་ལག་རམ་འབྱམས་པ་སློབ་མཐར་ཕྱིན།
ཁོ་མོ་ནི་ལྷའི་སློབ་སྟོན་ལྷན་ཚོགས་དང་ཡིད་ཆེས་དགེ་རྩའི་ལྷན་ཚོགས་གཉིས་ངོས་ནས་ལྷ་སྤྱི་ཚོགས་ཞབས་ཞུ་དང་ཤེས་ཡོན་ལྟེ་གནས་ཁང་གི་འགན་འཛིན་དུ་བསྐོ་བཞག་བྱས་པ་ཞིག་ཆགས་ཡོད་པ་རེད།
