ཉིན་ལྟར་ང་ཚོས་སྤྱི་ཚོགས་ཞབས་ཞུ་དང་ཤེས་ཡོན་སོགས་ཀྱི་ལས་གཞི་རྣམ་གྲངས་ ༢༠ ཙམ་ལག་བསྟར་བྱེད་ཀྱི་ཡོད་པར་བརྟེན། དེའི་ཕན་ནུས་དང་གྲུབ་འབྲས། དེ་བཞིན་ཡར་རྒྱས་ཇི་ལྟར་གཏོང་དགོས་མིན་སྐོར་ཤེས་རྟོག་གསལ་པོ་ཡོང་བར་དུས་ནས་དུས་སུ་དཔྱད་ཞིབ་བྱེད་ཀྱི་ཡོད་ཅིང་། ད་ཕན་སྐད་ཡིག་འཛིན་གྲྭའིི་སློབ་མ་ཚོར་དཔྱད་ཞིབ་ཐེངས་གསུམ་དང་། འཐུང་ཆུ་གཙང་བཟོའི་ལས་གཞིར་དཔྱད་ཞིབ་ཐེེངས་གཉིས། སྤྱི་ཐབ་ཀྱི་ལས་གཞིར་དཔྱད་ཞིབ་ཐེངས་གསུམ། ཁོར་ཡུར་སྲུང་སྐྱོབ་ཀྱི་གོ་རྟོགས་ལས་འགུལ་སྐོར་དཔྱད་ཞིབ་ཐེངས་གཅིག དྭང་བླངས་བ་ཚང་མར་མི་རེ་ངོ་རེར་བསམ་ཚུལ་བསྡུ་ལེན་དང་དཔྱད་ཞིབ། རིག་གཞུང་བརྗེ་རེས་གནང་མཁན་གྱི་སློབ་ཕྲུག་ཚང་མ་ལས་དགོངས་ཚུལ་བསྡུ་ལེན། འཕྲོད་བསྟེན་ལས་གཞིའི་སྐོར་དཔྱད་ཞིབ་སོགས་བྱས་ཡོད་པར་མ་ཟད།
ཕྱི་ལོ་ ༢༠༡༥ ལོར་ཨོ་སི་ཁྲུུའུ་ལི་ཡ་ནས་ཡིན་པའི་རིན་ཐང་དཔྱད་ཞིབ་མཁས་པ་གཉིས་ཀྱིས་དུས་ཡུན་ཟླ་བ་གཉིས་ལྷག་ཙམ་རིང་ཚོགས་པའི་ལས་དོན་ཡོངས་རྫོགས་ལ་དཔྱད་ཞིབ་བྱས་པ་བརྒྱུད། ཤོག་ངོས་ ༩༠ ཡོད་པའི་དཔྱད་ཞིབ་སྙན་ཐོ་ཞིག་འདོན་སྤེལ་གྱིས་ཡོངས་གྲགས་བྱས་ཤིང་། དཔྱད་ཞིབ་སྙན་ཐོའི་ནང་འཁོད་དོན་ལྟར་ན། ཚོགས་པའི་སྤྱི་ཚོགས་ཞབས་ཞུ་དང་ཤེས་ཡོན་སོགས་ཀྱི་ལས་དོན་འདི་དག་སྤྱི་ཚོགས་ནང་ཧ་ཅང་ཕན་ཐོགས་ཆེན་པོ་ཡོང་གི་ཡོད་པ་མ་ཟད། ཕྱི་རྒྱལ་དྭང་བླངས་བ་དང་རིག་གཞུང་བརྗེ་རེས་ཀྱི་སློབ་ཕྲུག་ཚོ་བོད་པའི་སྤྱི་ཚོགས་ལ་འབྲེལ་འདྲིས་དང་། བོད་དོན་སྐོར་ཤེས་རྟོགས། ཚོགས་པའི་ཞབས་ཞུའི་ལས་དོན་མང་པོར་མཉམ་ཞུགས་ཀྱིས་ཆ་ཤས་ལེན་སྐབས། ཁོ་ཚོའི་མི་ཚེ་བཟང་ཕྱོགས་སུ་འགྱུར་ལྡོག་འགྲོ་བར་ཕན་ཐོགས་དང་། དོན་དང་ལྡན་པའི་ཉམས་མྱོང་མང་པོ་གསག་རྒྱུའི་གོ་སྐབས་རག་ཡོད་ལུགས་དང་། དེ་བཞིན་གོང་གསལ་ལས་གཞི་ཁག་རེ་རེ་བཞིན་དཔྱད་ཞིབ་བྱས་པའི་གྲུབ་དོན་སྙན་ཐོའི་ནང་ལ་ཡང་ཞབས་ཞུ་ཁག་གི་ཁེ་ཕན་འཐོབ་མཁན་ཚོས་ཚད་མཐོའི་གདེང་འཇོག་དང་འབྲེལ། ཉིན་རེའི་འཚོ་བའི་ནང་མིག་མཐོང་ལག་ཟིན་གྱིས་ཁེ་ཕན་ཧ་ཅང་ཆེན་པོ་བྱུང་སྟེ་ང་ཚོའི་ཞབས་ཞུའི་ལས་དོན་ཁག་གིས་འདོད་བློ་ཁེངས་ཤིང་། བློ་སྐྱེད་རག་པ་དང་རང་སྟོབས་ཀྱི་ནུས་པ་སོགས་ཡར་རྒྱས་འགྲོ་བར་ཕན་ཐོགས་ཆེན་པོ་བྱུང་ཡོད་སྐོར་དང་། ཁྱད་ལས་པ་དེ་གཉིས་ཀྱིས་ཚོགས་པའི་ལས་དོན་ཡར་རྒྱས་གཏོང་དགོས་པའི་གནས་དོན་ཁག་ཅིག་ཀྱང་གསལ་འདེབས་བྱས་ཡོད་པ་རེད།
ངས་ཡུལ་སྐོར་སྣེ་ཤན་གྱི་དེབ་ ལས་ལྷའི་སྐོར་སྦྱངས་ཤིང་། བོད་རིགས་ལ་གདུང་སེམས་མཉམ་སྐྱེད་བྱེད་པར་དྷ་སར་ཡོང་རྒྱུར་ཐག་བཅད་པ་ཡིན། ཐོག་མར་ཟླ་བ་ལྔར་སྡོད་རྒྱུའི་རྩིས་བྱས་ཀྱང་། ལྷ་དང་མཉམ་དུ་ངའི་ལས་དོན་ཁག་ལེགས་གྲུབ་དང་དོན་ལྡན་དུ་གྱུར་སྟབས་རྒྱུན་རིང་པོར་སྡོད་རྒྱུར་ཐག་བཅད་པ་ཡིན། དེ་ནི་འགྲིག་ཐག་ཆོད་པའི་གནད་དོན་ཞིག་རེད། – སུ་སི་ནས་ཡིན་པའི་ལྷའི་དང་བླངས་བ་སཱ་རའ་ཝེབ་བྷར་།
ལྷ་ལ་འཛུལ་ཞུགས་མ་བྱས་པའི་སྔོན་དུ་ངས་བོད་པའི་འཐབ་རྩོད་སྐོར་ཅུང་ཙམ་ལས་མི་ཤེས། ཁོང་ཚོའི་ལུང་པའི་ནང་དུ་དཀའ་ངལ་ཡོད་པའི་སྐབས་སུ་ཁོང་ཚོར་ཕན་འདོགས་ཆེེད་སློབ་ཕྲུག་ཚོར་སློབ་ཚན་འཁྲིད་རྒྱུར་དགའ་པོ་ཡོད། – རྒྱ་གར་ནས་ཡིན་པའི་ཨཱ་ཕུར་ཝ་ཀཱ་ཤཱིབ་།
ཐོག་མ་དེར་ངས་བསམས་པར། ལྷ་སྤྱི་ཚོགས་ཞབས་ཞུ་ཚོགས་པས་ང་ལ་སྐད་ཡིག་སློབ་སྦྱོང་དང་གློག་ཀླད་སྦྱོར་བརྡར་གྱི་གོ་སྐབས་ཧ་ལས་པ་སྤྲད་བྱུང་། འདི་ནི་ལྷ་ལྟ་བུའི་ཚོགས་སྡེ་ཞིག་གི་ནང་ངས་ཉམས་མྱོང་བསགས་པ་ཐེངས་དང་པོ་ཡིན་ལ་ཧ་ཅང་དགའ་པོ་ཡང་བྱུང་སོང་། དེར་བརྟེན་ང་ཚོ་སོ་སོའི་རྒྱལ་ཁབ་དེ་ཚུར་མ་རག་བར་དུ་ལྷ་སྤྱི་ཚོགས་ཞབས་ཞུ་ཚོགས་པས་ལས་རིམ་འདི་འདྲ་མུ་མཐུད་ནས་གཉེར་རྒྱུར་ངས་རེ་བ་དང་སྨོན་འདུན་ཞུ་བཞིན་ཡོད། – བསྟན་འཛིན་སྐལ་ལྡན།
ལྷ་སྤྱི་ཚོགས་ཞབས་ཞུ་ཚོགས་པའི་ཞབས་ཞུ་མཐུན་རྐྱེན་དེ་ཧ་ཅང་ཕན་ཐོགས་ཆེན་པོ་འདུག་ལ། ལས་བྱེད་ཚོའི་ཕྱག་ལས་གནང་སྟངས་ཀྱང་ཧ་ཅང་སྣང་བ་འགྲོ་བོ་དང་ལྷག་བསམ་རྣམ་དག་རེད་འདུག – ངག་དབང་སྒྲོལ་མ།
འདིའི་ཉམས་མྱོང་ལས་ངའི་རོགས་པར་ཏན་ཏན་ཕན་ཐོགས་བྱུང་ཡོད། ཁོང་ནི་རང་ཉིད་ཀྱི་མི་ཚེ་དང་ལོ་རྒྱུས་སྐོར་ཧ་ཅང་ཁ་གསང་པོ་འདུག་ལ། གཞན་གྱི་སྐད་ཡིག་ཐེ་བའི་དབྱིན་ཡིག་སྦྱོང་རྒྱུར་འདོད་མོས་ཆེན་པོ་ཡོད་མཁན་ཞིག་རེད། དེར་བརྟེན་ངས་ཁོང་ནི་སློབ་སྦྱོང་ཡག་པོ་བྱེད་མཁན་གྱི་རོགས་པ་ཞིག་ལ་ངོས་འཛིན་བྱེད་བཞིན་ཡོད། – ཨན་ཌོར་ཨན། ཨ་རི་བ།