ཚོགས་པའི་ལས་དོན་དང་ཚོགས་འདུ་སོགས་ཀྱི་ཆེད་ལས་བྱེད་མང་པོ་ཕྱིའི་རྒྱལ་ཁབ་ལ་སྐོར་སྐྱོད་དང་། ཚོགས་འདུ། ཟབ་སྦྱོང་སོགས་སུ་མཉམ་ཞུགས་བྱེད་མུས་ལྟར།
ཕྱི་ལོ་ ༢༠༡༧ ཟླ་ ༨ ཚེས་ ༢༢ ནས་ ༢༥ བར་ཐའེ་ཝན་རྒྱལ་ཡོངས་ཆོའུ་ཏང་གཙུག་ལག་སློབ་གྲྭ་དང་འབྲེལ་ཡོད་ཚོགས་སྡེ་ཁག་གིས་གོ་སྒྲིག་འོག་མི་སེར་ཀྱི་ཉམས་མྱོང་བརྗེ་རེས་དང་། གཞུང་འབྲེལ་མ་ཡིན་པའི་ཚོགས་པ་དང་གོ་ལའི་མི་སེར་གྱི་ཐོབ་ཐང་གི་ཤེས་ཡོན་སྐོར་རྒྱལ་སྤྱིའི་ཚོགས་འདུར་ཚོགས་པའི་དྲུང་ཆེ་རྡོ་རྗེ་སྐྱིད་དང་འབྲེལ་གཏུག་དུས་དེབ་ཀྱི་རྩོམ་སྒྲིག་པ་བསྟན་འཛིན་བསམ་གཏན་གཉིས་ཆེད་བསྐྱོད་ཀྱིས་མཉམ་ཞུགས་བྱས་ཡོད་པ་དང་། ཚོགས་འདུ་དེར་རྒྱལ་ཚོགས་ཀྱི་ཤེས་ཡོན་དང་། ཚན་རིག ལེགས་བྱང་ལྷན་ཚོགས་ཀྱི་ཁྱབ་ཁོངས་གོ་ལའི་སློབ་གཉེར་དང་གོ་ལའི་མི་སེར་གྱི་ཐོབ་ཐང་ཤེས་ཡོན་གྱི་གཙོ་འཛིན་དང་། དེ་ནས་ཨ་རི་དང་། ནེའུ་ཛི་ལན་ཌི། བྷི་རི་ཛལ། ཐའེ་ཝན་སོགས་ཀྱི་གཙུག་ལག་སློབ་གྲྭ་འགའ་ཤས་ཀྱིས་སློབ་དཔོན་དང་གཞུང་འབྲེལ་མ་ཡིན་པའི་ཚོགས་པའི་འགན་འཛིན་དང་དྲུང་ཆེ་སོགས་རྒྱལ་སྤྱིའི་གཞུང་འབྲེལ་མ་ཡིན་པའི་ཚོགས་སྡེ་ ༣༥ ཙམ་གྱི་སྐུ་ཚབ་ཆེད་ཕེབས་ཀྱིས་ཆ་ཤས་བླངས་ཡོད། ང་ཚོའི་དྲུང་ཆེ་རྡོ་རྗེ་སྐྱིད་ལགས་ཀྱིས་བོད་དོན་དང་ཚོགས་པའི་སྐོར་ངོ་སྤྲོད་གཏམ་བཤད་བྱས་ཏེ་ཚོགས་པའི་ལས་དོན་དང་བོད་དོན་དྲིལ་བསྒྲགས་སོགས་གང་ལེགས་བྱུང་ཡོད།

ཕྱི་ལོ་ ༢༠༡༥ ལོར་ཚོགས་པའི་འགན་འཛིན་ཡུ་རོབ་རྒྱལ་ཁབ་ཨིན་ཡུལ་དང་སུད་སི་སོགས་སུ་སྐོར་སྐྱོད་ཀྱིས་དཔལ་འབྱོར་འདུ་འགོད་དང་རོགས་ཚོགས་ཁག་ཐུག་འཕྲད་ཀྱིས་ལས་དོན་གང་ལེགས་བྱུང་ཡོད། ཡང་ ༢༠༡༦ ལོར་ལྷའི་འགན་འཛིན་དུས་ཡུན་ཟླ་བ་གཅིག་ཙམ་གྱི་རིང་ཨ་རི་དང་མེག་སི་ཀོ་ཁུལ་དུ་ཆེད་བསྐྱོད་ཀྱིས་དེ་སྔོན་ནས་ང་ཚོའི་ཚོགས་པ་དང་འབྲེལ་བ་ཆེན་པོ་ཡོད་པའི་ཚོགས་པ་འདྲ་མིན་དང་། གཙུག་ལག་སློབ་གཉེར་ཁང་། མི་སྒེར་པ་སོགས་མང་པོ་ཞིག་ལ་ཆེད་བཅར་ཐུག་འཕྲད་དང་ལག་རྟགས་འབུལ་བ་སོགས་བྱས་ཏེ་ལྷག་བསམ་ཟོལ་མེད་ཀྱིས་རྒྱབ་སྐྱོར་དང་། རོགས་རམ། མཉམ་ལས་བཅས་གནང་བར་ཐུགས་རྗེ་ཆེ་ཞུས་པར་མ་ཚད། འདས་པའི་མཉམ་ལས་ཀྱི་ལས་དོན་ལ་བསྐྱར་ཞིབ་དང་མ་འོངས་པའི་ལས་འཆར་གསར་པར་མཉམ་ལས་བྱེད་ཕྱོགས་སྐོར་གྲོས་བསྡུར་ལྷུག་པོར་བྱེད་ཐུབ་ཡོད་པ་རེད།

དེ་བཞིན་ཚོགས་པ་གཞན་མང་པོར་ཆེད་བཅར་དང་གནད་ཡོད་མི་སྣ་མང་པོར་ཐུག་འཕྲད་ཀྱིས་འབྲེལ་ལམ་གསར་འཛུགས་ཐུབ་པ་བྱུང་བ་དང་། ཚོགས་སྡེ་མང་པོས་འགན་འཛིན་ངག་དབང་རབ་རྒྱས་ལགས་ལ་མགྲོན་འབོད་སྣེ་ལེན་གནང་ཞིང་། སྐབས་དེར་ཁོང་གིས་ད་ལྟའི་བོད་ནང་གི་གནས་སྟངས་སོགས་ངོ་སྤྲོད་དང་ལྷན་དུ་ཚོགས་པའི་ལས་དོན་ངོ་སྤྲོད། ཚོགས་པའི་ངོ་སྤྲོད་ཡིག་ཆ་ཁག་དང་འབྲེལ་གཏུག་དུས་དེབ་བཅས་འགྲེམ་སྤེལ་བྱེད་པའི་གོ་སྐབས་གང་ལེགས་བྱུང་ཡོད། བོད་པའི་གསར་འགྱུར་བརྒྱུད་ལམ་གྲགས་ཆེ་ཤོས་གཉིས་ཏེ་ཨེ་ཤེ་ཡ་རང་དབང་རླུང་འཕྲིན་ཁང་དང་། ཨ་རིའི་ཀུན་གླེང་གསར་འགྱུར་ལས་ཁུངས་གཉིས་ཀྱིས་བཅར་འདྲི་བྱས་ཤིང་། དུས་ཡུན་ཆུ་ཚོད་གཉིས་ཙམ་གྱི་རིང་ལྷ་སྤྱི་ཚོགས་ཞབས་ཞུ་དང་ཤེས་ཡོན་ལྟེ་གནས་ཁང་གི་ལས་དོན་ཞིབ་ཕྲ་ངོ་སྤྲོད་དང་། ཨ་རི་དང་འཛམ་གླིང་གི་ས་ཕྱོགས་གང་ས་ནས་ཚོགས་པར་རྒྱབ་སྐྱོར་གནང་མཁན་དང་མཉམ་ལས་གནང་མཁན་བཅས་ལ་ཆེད་བཅར་གྱིས་ཐུགས་རྗེ་ཆེ་ཞུས་པ་རེད། དེ་བཞིན་ཚོགས་པའི་འགན་འཛིན་གཞོན་པ་བློ་བཟང་རབ་གསལ་དང་དྲུང་ཆེ་རྡོ་རྗེ་སྐྱིད་གཙོས་པའི་འབྲེལ་ཡོད་ལས་བྱེད་མང་པོ་བོད་པའི་གཞུང་འབྲེལ་མ་ཡིན་པའི་ཚོགས་འདུ་དང་ཟབ་སྦྱོང་། རྒྱལ་སྤྱིའི་ཚོགས་འདུ་སོགས་སུ་ཆེད་བསྐྱོད་ཀྱིས་མཉམ་ཞུགས་བྱས་ཡོོད།